Rhyngom

Plethu pobl trwy lyfrau

Rydym wedi bod yn gweithio gyda chyhoeddwyr a phartneriaid ledled Cymru i gyhoeddi mwy o lyfrau darllen er pleser sy’n dathlu ac yn hyrwyddo amrywiaeth ar gyfer plant a phobl ifanc. 

Llyfrau newydd i blant a phobl ifanc

Ariannwyd y prosiect tair blynedd, £810,000 hwn gan Adran Addysg Llywodraeth Cymru, ac Adnodd. Mae wedi cefnogi creu llyfrau gwreiddiol newydd yn y Gymraeg ac yn Saesneg, yn ogystal ag addasiadau o lyfrau Saesneg i’r Gymraeg, er mwyn creu llyfrau sy’n adlewyrchu mwy o’n straeon, ein pobl a’n cymunedau ni.

Mae darllen er pleser yn bwysig ar gyfer cefnogi iechyd a lles plant a phobl ifanc, ac ar gyfer datblygu eu dychymyg a sgiliau llythrennedd; buddion sy’n cefnogi nodau a darparu’r Cwricwlwm i Gymru ac sy’n cyfrannu at gyflawniadau addysgol.

Mae adnoddau addysg yn cyd-fynd â holl lyfrau’r gyfres, er mwyn galluogi athrawon a dysgwyr i archwilio’r themâu a’r cwestiynau sy’n codi ynddynt yn fwy trylwyr. Mae pob ysgol wladol yng Nghymru wedi derbyn cyflenwad o’r llyfrau a’r adnoddau addysg am ddim i’w defnyddio yn y dosbarth.

Gweithio gyda’n gilydd

Rydym yn hynod ddiolchgar i’n partneriaid niferus sydd wedi cyfrannu eu profiad a’u harbenigedd drwy gydol y prosiect hwn, a oedd yn gyd-gynhyrchiad; gan gynnwys aelodau ein panel a helpodd ddewis y llyfrau i’w haddasu; y mentoriaid a’r darllenwyr sensitifrwydd a gefnogodd yr awduron; y panel a greodd yr adnoddau addysg; ac, wrth gwrs, y cyhoeddwyr ledled Cymru am gefnogi’r prosiect, a’r awduron eu hunain.

Diolch i:

• Adran Addysg Llywodraeth Cymru
• Adnodd
• Anabledd Cymru
• Cwmni Diwylliannol a Chelfyddydol Romani
• DARPL
• Hanes Pobl Dduon Cymru
• Race Council Cymru
• Stonewall Cymru

Awduron newydd, llyfrau newydd

Mae’r llyfrau newydd yn cynnwys gweithiau gan rai sy’n ysgrifennu am y tro cyntaf yn ogystal ag awduron cydnabyddedig. Un o’r prif amcanion wrth gomisiynu llyfrau gwreiddiol Cymraeg a Saesneg fel rhan o’r cynllun hwn oedd sicrhau cyfleoedd cyhoeddi i awduron a darlunwyr o gefndiroedd a chymunedau sy’n cael eu tangynrychioli. Cefnogwyd rhai awduron newydd i weithio gyda mentor, neu i gyd-awduro gydag awdur mwy profiadol.

Addasiadau Cymraeg 

Erbyn gwanwyn 2025 cyhoeddwyd addasiadau Cymraeg o 28 o deitlau Saesneg sy’n hyrwyddo a dathlu amrywiaeth – yn eu plith, teitlau sydd wedi ennill gwobrau fel y Diverse Book Award – ac maent ar gael i’w prynu mewn siopau llyfrau.

Adnoddau ar gyfer ysgolion

Mae adnoddau addysg ar gyfer yr holl lyfrau a gyhoeddwyd fel rhan o gynllun Rhyngom ar gael mewn print neu ar ffurf ddigidol, yn roi cymorth ychwanegol gwerthfawr i athrawon.

Rhan olaf y prosiect, yn yr hydref 2025, oedd cynllun anrhegu i ysgolion cynradd ac uwchradd Cymru. Mae pob ysgol gynradd wladol wedi derbyn copi am ddim o’r llyfrau i ddarllenwyr 3–11 oed, a phob ysgol uwchradd wladol wedi derbyn copi o’r llyfrau i ddarllenwyr 8–16 oed. Mae ysgolion hefyd wedi derbyn yr adnoddau addysg.