Grantiau
Ariennir ein grantiau craidd gan Lywodraeth Cymru, trwy Cymru Greadigol, i gefnogi cynhyrchu llyfrau a chylchgronau yn y Gymraeg ac yn Saesneg. Mae cyllid hefyd ar gael i gyhoeddwyr gomisiynu awduron, cyflogi golygyddion creadigol a swyddogion marchnata, ac ar gyfer rhai gweithgareddau marchnata llyfrau.
Dosbarthu
Lleolir ein Canolfan Ddosbarthu nid-er-elw, sy’n gartref i oddeutu miliwn o lyfrau, ar Barc Menter Glanyrafon, ychydig o filltiroedd y tu allan i dref Aberystwyth. Mae gennym ffocws cryf ar lyfrau o Gymru ac am Gymru yn y Gymraeg a’r Saesneg. Rydym yn dosbarthu a chyfanwerthu llyfrau a chylchgronau ar ran cyhoeddwyr ledled Cymru, y DU ac yn rhyngwladol.
Gwasanaethau Golygyddol a Dylunio
Mae ein timau mewnol yn cynnig gwasanaethau dylunio a golygyddol gyda chymhorthdal i gyhoeddwyr yng Nghymru. Y nod yw cefnogi a gwella ansawdd llyfrau a gynhyrchir ac a gyhoeddir yng Nghymru yn y Gymraeg a’r Saesneg.
Golygyddol
Mae’r tîm golygyddol yn cynnig gwasanaeth golygyddol gyda chymhorthdal ar gyfer deunydd Cymraeg a Saesneg, i olygu teipysgrifau a chywiro proflenni. Rydym yn gweithio’n bennaf gyda deunydd darllen hamdden ac yn delio â hyd at 180 o deipysgrifau bob blwyddyn.
Rydym yn darparu’r gwasanaethau hyn ar gyfer oddeutu 20 o gyhoeddwyr yng Nghymru, gan fanteisio ar gymorth tîm bychan o olygyddion allanol profiadol yn ôl yr angen. Rhoddir blaenoriaeth bob amser i lyfrau sydd wedi derbyn grantiau cyhoeddi gan y Cyngor Llyfrau. Noder: nid ydym yn ymdrin â deunydd addysgol.
Dylunio
Rydym yn cynnig y gwasanaethau dylunio canlynol:
- Dylunio cloriau llyfrau
- Dylunio llyfrau o glawr i glawr
- Darparu deunydd gweledol, megis darluniau a ffotograffau, ar gyfer llyfrau
Mae’r tîm yn cynnwys yr Arweinydd Maes: Dylunio, a dau Swyddog Dylunio profiadol. Rydym yn cydweithio â dylunwyr, arlunwyr a ffotograffwyr llawrydd i gefnogi gwaith cyhoeddwyr Cymru.
Cyfieithu
Nid ydym yn cynnig grantiau ar gyfer cyfieithu, heblaw am ddarparu rhywfaint o gyllid i’r cyhoeddwyr rydym yn eu cefnogi i gynhyrchu addasiadau Cymraeg o lyfrau plant.