Llywodraethiant ac Ymddiriedolwyr

Mae gan Gyngor Llyfrau Cymru statws elusennol ers i ni gael ein sefydlu yn 1961, ac mae ein trefniadau llywodraethu yn unol â gofynion y Comisiwn Elusennau. Ar 1 Ebrill 2021, fe wnaethom drosglwyddo o fod yn elusen anghofrestredig i fod yn Sefydliad Corfforedig Elusennol (SCE) gyda Bwrdd Ymddiriedolwyr newydd ac aelodaeth newydd o’r Cyngor.

Fel SCE ac elusen gofrestredig (Rhif Elusen Gofrestredig 1192269), mae ein pwrpas elusennol wedi ei nodi yn ein Cyfansoddiad, ynghyd â’n nodau a’n hamcanion.

Ein hamcanion

Nod y Cyngor Llyfrau yw hyrwyddo, hybu a datblygu gwerthfawrogiad a diddordeb y cyhoedd mewn llyfrau, llenyddiaeth a darllen yng Nghymru, a hynny heb gyfyngu dim ar yr amcanion cyffredinol a nodwyd, ond yn hytrach er mwyn hyrwyddo’r amcanion hynny ac nid fel arall:

• cefnogi a chynorthwyo’r diwydiant llyfrau yng Nghymru drwy roi grantiau a thrwy ddulliau eraill
• cefnogi, hybu a chynorthwyo cynhyrchu a dosbarthu llyfrau a deunydd llenyddol ac artistig arall, ym mha ffurf bynnag y’u cofnodwyd (boed trwy ddulliau sy’n hysbys neu thrwy ddulliau sydd hyd yn hyn yn anhysbys) yn nwy iaith swyddogol Cymru, y Gymraeg a’r Saesneg, neu’n ymwneud â Chymru;
• trefnu digwyddiadau i gefnogi hyrwyddo llyfrau, darllen a’r sector llyfrau yn ei gyfanrwydd
• cefnogi hybu a chyhoeddi’r cyfryw lyfrau a deunydd arall yng Nghymru.

Gallwch ddarganfod mwy drwy ddilyn y ddolen i’n Cyfansoddiad:

Cyfansoddiad Cyngor Llyfrau Cymru (PDF)

Prif Weithredwr

Penodwyd Helgard Krause yn Brif Weithredwr Cyngor Llyfrau Cymru ym mis Ebrill 2017, ac mae hi’n adrodd i Gadeirydd a Bwrdd yr Ymddiriedolwyr. Mae hi’n gyfrifol am arwain a gosod cyfeiriad strategol y Cyngor Llyfrau, ac am eirioli dros y sector gyda Llywodraeth Cymru a Cymru Greadigol, ein prif gyllidwyr.

Ymddiriedolwyr

Mae hyd at 12 aelod ar y Bwrdd Ymddiriedolwyr. Maent yn gyfrifol am lywodraethiant y Cyngor Llyfrau ac am oruchwylio cyfeiriad strategol yr elusen. Y prif swyddogion yw:

Cadeirydd: Linda Tomos

Is-Gadeirydd: Rona Aldrich

Trysorydd: Alfred Oyekoya

Ymddiriedolwyr Cyngor Llyfrau Cymru

Mae’r Bwrdd yn cynnal pedwar cyfarfod y flwyddyn ac yn sicrhau bod y Cyngor Llyfrau yn cyrraedd ac yn cadw at ei amcanion fel SCE, fel y nodir yn ein Cyfansoddiad.

Aelodaeth y Cyngor

Mae’r aelodaeth yn cynnwys cynrychiolwyr o awdurdodau lleol a sefydliadau eraill sydd, ar ôl y trefniadau cyfansoddiadol newydd a ddaeth i rym ar 1 Ebrill 2021, wedi dod yn aelodau o’r elusen.

Caiff Cyfarfod Cyffredinol Blynyddol o’r Cyngor, sy’n cynnwys holl aelodau’r elusen, ei gynnal unwaith y flwyddyn ym mis Gorffennaf. Mae’r cyfarfod yn gyhoeddus ac yn agored i bawb.

Mae’r aelodaeth hefyd yn cynnwys cynrychiolaeth o is-bwyllgorau’r Cyngor.

Is-bwyllgorau

Mae gan y Cyngor Llyfrau dri is-bwyllgor annibynnol sy’n cefnogi ein gwaith.

Mae dau Is-bwyllgor Datblygu Cyhoeddi (Cymraeg a Saesneg) a hwy yw’r paneli annibynnol sy’n dosrannu grantiau i gyhoeddwyr.

Mae Is-bwyllgor Hyrwyddo Darllen yn banel ymgynghorol sy’n cefnogi gwaith yr Adran Llyfrau Plant a Hyrwyddo Darllen.

Cyfeillion Cyngor Llyfrau Cymru

Sefydlwyd Cyfeillion Cyngor Llyfrau Cymru yn 1995 i hyrwyddo ein gwaith a chefnogi’r diwydiant llyfrau yng Nghymru, yn y Gymraeg a’r Saesneg.

Cyfeillion Cyngor Llyfrau Cymru

Gwirfoddoli

Rydym yn ddiolchgar i’n Ymddiriedolwyr ac aelodau ein his-bwyllgorau, sy’n cyflawni eu gwaith o’i gwirfodd. Mae modd dod o hyd i fwy o wybodaeth am sut y gallwch gefnogi ein gwaith fel Ymddiriedolwr neu ddod yn aelod o’n his-bwyllgorau ar ein tudalen gwirfoddoli.

Gwirfoddoli