Her yr Hydref

• Awydd darllen mwy o lyfrau Cymraeg ond ddim yn siwr lle i ddechrau?
• Dim digon o amser i ddarllen?
• Chwilio am her ar gyfer yr hydref?

Mae Her yr Hydref yn eich annog chi i ddarllen un llyfr bob wythnos yn ystod mis Hydref. Mae’r rhestr arbennig hon o lyfrau byrion gan awduron arbennig yn cynnig y cyfle perffaith i ymgolli mewn llyfr – hyd yn oed os mai dim ond ychydig funudau’r dydd sydd gennych.

Dyma ambell gyfrol ar y rhestr eleni, ar gael nawr o’ch siop lyfrau leol.

Cylchgronau amrywiol o Gymru

O Ffrwyth y Gangen Hon

Cerddi am orfoledd – dyma oedd yr alwad agored i “feirdd benywaidd o bob cefndir”. A dyma’r flodeugerdd wedi dwyn ffrwyth, gyda chyfraniadau gan leisiau cyfarwydd a lleisiau newydd sbon. O gerddi tyner i rai swnllyd a doniol, cewch flasu amrywiaeth o farddoniaeth yn y gyfrol hon i ddathlu benyweidd-dra yn ei gyfanrwydd.

Pelydrau

Casgliad o 7 stori fer ar y themâu ‘goleuni’ a ‘heddwch’. Mae’r casgliad yn cynnwys gwaith enillwyr cystadleuaeth stori fer Sebra 2025 ynghyd â’r awduron profiadol Mererid Hopwood, Alun Davies, Sioned Erin Hughes ac Aled Jones-Williams.

Ble aeth Elen Puw?

Nofel ddirgelwch gyfoes. Yn oriau mân y bore ym mis Mai 1973 diflannodd Elen Puw, merch ysgol 18 oed, ar y ffordd adre. Yn 2024 mae Sara Price, newyddiadurwraig gyda’r BBC, yn dychwelyd i’w thref enedigol i ymchwilio i ddiflaniad Elen ar gyfer podlediad.