Ymddiriedolwyr

Trefniadau Llywodraethiant

Mae Cyngor Llyfrau Cymru wedi bod yn elusen ers ei sefydlu yn 1961 ac mae ein trefniadau llywodraethiant yn cydymffurfio â gofynion y Comisiwn Elusennau.

Ar 1 Ebrill 2021, fe drosglwyddodd y Cyngor Llyfrau o fod yn elusen anghofrestredig i fod yn Sefydliad Corfforedig Elusennol (SCE) gyda Bwrdd Ymddiriedolwyr newydd.

Mae 11 aelod ar y Bwrdd Ymddiriedolwyr, yn cynnwys y pedwar Prif Swyddog a drosglwyddodd o hen Bwyllgor Gwaith y Cyngor a saith penodiad newydd a gyhoeddwyd ar 1 Ebrill 2021 yn dilyn proses recriwtio agored.

Y Bwrdd sy’n gyfrifol am lywodraethiant y Cyngor Llyfrau ac am oruchwylio cyfeiriad a strategaeth yr elusen, gan gefnogi’r tîm mewnol o swyddogion profiadol sy’n gwasanaethu’r byd cyhoeddi yn y Gymraeg a’r Saesneg.

Mae’n cynnal pedwar cyfarfod llawn bob blwyddyn ac yn sicrhau bod y Cyngor Llyfrau yn cyrraedd ac yn cadw at ei amcanion fel Sefydliad Corfforedig Elusennol (SCE).

Amcanion y Cyngor Llyfrau

Nod y Cyngor Llyfrau yw hyrwyddo, hybu a datblygu gwerthfawrogiad a diddordeb y cyhoedd mewn llyfrau, llenyddiaeth a darllen yng Nghymru heb gyfyngu dim ar yr amcanion cyffredinol a nodwyd ond yn hytrach er mwyn hyrwyddo’r amcanion hynny ac nid fel arall:

• cefnogi a chynhorthwy’r diwydiant llyfrau yng Nghymru drwy roi grantiau a thrwy ddulliau eraill;
• cefnogi, hybu a chynorthwyo cynhyrchu a dosbarthu llyfrau a deunydd llenyddol ac artistig arall, ym mha ffurf bynnag y’u cofnodwyd (boed trwy ddulliau sy’n hysbys neu trwy ddulliau sydd hyd yn hyn yn anhysbys) yn nwy iaith swyddogol Cymru, y Gymraeg a’r Saesneg, neu’n ymwneud â Chymru;
• trefnu digwyddiadau i gefnogi hyrwyddo llyfrau, darllen a’r sector llyfrau yn ei gyfanrwydd;
• cefnogi hybu a chyhoeddi’r cyfryw lyfrau a deunydd arall yng Nghymru.

Cyngor y Cyngor Llyfrau

O dan y trefniadau cyfansoddiadol newydd a ddaeth i rym ar 1 Ebrill 2021, fe drosglwyddodd aelodau eraill y Pwyllgor Gwaith ac aelodau Cyngor y Cyngor Llyfrau – sy’n cynnwys cynrychiolwyr o’r awdurdodau sir a sefydliadau eraill – i fod yn aelodau ‘Cyngor’ o’r elusen ar 1 Ebrill 2021.

Caiff Cyfarfod Cyffredinol Blynyddol o’r Cyngor, sy’n cynnwys holl aelodau’r elusen, ei gynnal unwaith y flwyddyn ym mis Gorffennaf. Mae’r cyfarfod yn gyhoeddus ac yn agored i bawb.

Mae gan y Cyngor Llyfrau dri is-bwyllgor sy’n gwneud penderfyniadau ar ddosrannu grantiau cyhoeddi a hyrwyddo darllen.

Caiff aelodau’r Is-Bwyllgorau eu penodi fel rhan o broses recriwtio agored ac maen nhw’n annibynnol.

Mae holl aelodau’r Bwrdd Ymddiriedolwyr, Cyngor y Cyngor Llyfrau a’r Is-Bwyllgorau yn cyflawni eu gwaith yn wirfoddol ac yn ddi-dal ac eithrio hawliau treuliau perthnasol.