Cystadleuaeth flynyddol sydd yn annog darllenwyr ifanc Blynyddoedd 3–6 i ddarllen er pleser. Mae Bookslam yn annog dysgwyr i drafod y llyfrau maen nhw’n eu darllen a pharatoi fideo creadigol, fel grŵp neu ddosbarth, yn seiliedig ar un o’r llyfrau sydd ar y rhestr ddarllen. 

Mae 3 chategori a rhestr ddarllen ar gael ar gyfer:  

• Blynyddoedd 3 – 6 cyfrwng Saesneg 

• Blynyddoedd 3 a 4 (cyfrwng Cymraeg) ac ysgolion trawsieithol  

• Blynyddoedd 5 a 6 cyfrwng Cymraeg  

Bydd angen i ysgolion ddewis un llyfr o’r rhestr i’w drafod ac un arall i’w gyflwyno fel hysbyseb. Cynhelir rownd sirol dan ofal y trefnwyr sirol, a bydd yr enillwyr sirol yn mynd ymlaen i’r rownd genedlaethol yn nhymor yr haf. 

Bydd yr ysgolion buddugol yn ennill tlws arbennig ynghyd ag un o’r gwobrau canlynol; 

• Gwobr 1af – gwerth £200 o lyfrau 

• 2ail wobr – gwerth £150 o lyfrau 

• 3edd wobr – gwerth £100 o lyfrau 

Mae mwy o wybodaeth am y rowndiau sirol a chenedlaethol yn ein Bookslam Guide, yn ogystal â Activity Pack sydd ar gael i ysgolion trwy gysylltu â ni’n uniongyrchol  plant@llyfrau.cymru  neu’r trefnwyr sirol. 

Manteision Allweddol

Mae’n her ddarllen hwyliog sy’n:

• annog plant i wirioni ar ddarllen a mwynhau llyfrau da
• meithrin agweddau cadarnhaol a hirdymor tuag at ddarllen
• cefnogi datblygiad llythrennedd emosiynol a meithrin sgiliau trafod, cyfathrebu a dadansoddi
• cyd-fynd â gofynion y Cwricwlwm trwy gynnig amrywiaeth o weithgareddau i unigolion a grwpiau ar draws y Meysydd Dysgu a Phrofiad
• hyrwyddo a chodi ymwybyddiaeth o lyfrau, awduron a darlunwyr
• dathlu safon eithriadol ym maes llenyddiaeth plant

Cofrestrwch i’r Gystadleuaeth Gornest Lyfrau

Gall ysgolion gofrestru gyda’u trefnydd lleol erbyn 05 Rhagfyr 2024.

Os hoffech ragor o fanylion am eich trefnydd lleol, cysylltwch â plant@llyfrau.cymru