Mae’r rhestr isod yn cynnwys crynodeb o’r grantiau sydd ar gael ar gyfer cyhoeddi deunydd Saesneg yng Nghymru. I gael manylion llawn, cysylltwch â’n Swyddog Datblygu Cyhoeddi (Saesneg), Dr Ashley Owen, ar english.grants@books.wales. Edrychwch hefyd ar y canllawiau a’r amodau ar gyfer ceisiadau grant ar ein tudalen ‘Sut i Ymgeisio’.
Grantiau Llyfrau Llenyddol Unigol
Grantiau tuag at gynhyrchu llyfrau llenyddol neu ddiwylliannol o ddiddordeb Cymreig neu gan awduron sy’n byw yng Nghymru, i oedolion neu blant.
Grantiau Refeniw
Grantiau tuag at orbenion a rhaglenni llenyddol cyhoeddwyr a leolir yng Nghymru. Dylai cyhoeddwyr sydd eisoes yn cyhoeddi llenyddiaeth Saesneg o Gymru, ac a hoffai wybod mwy am y posibilrwydd o dderbyn nawdd refeniw, gysylltu â’r Adran Datblygu Cyhoeddi.
Blaendaliadau/Comisiynau i Awduron a Darlunwyr
Grantiau i alluogi cyhoeddwyr i gynnig blaendal ar freindaliadau neu i dalu ffioedd comisiynu i awduron neu ddarlunwyr i greu gwaith o safon ac eang ei apêl.
Grantiau Marchnata
Grantiau tuag at hyrwyddo teitlau unigol neu grwpiau o deitlau y mae disgwyl i’w gwerthiant fod yn uchel.
Cefnogi Swyddi
Cyfraniadau tuag at gost cyflogi staff golygyddol a marchnata oddi mewn i gwmni cyhoeddi. Penderfynir ar y grantiau hyn drwy broses dendro – gellir dod o hyd i fanylion yr alwad nesaf yma: Tendrau.
Cylchgronau Diwylliannol
Mae’r cynllun hwn yn noddi cylchgronau newydd a sefydledig sy’n cynnwys ysgrifennu rhagorol a newyddiaduraeth dreiddgar ar ystod eang o bynciau, gan gynnwys gwleidyddiaeth a materion cyfoes, diwylliant a’r celfyddydau. Penderfynir ar y grantiau hyn drwy broses dendro – gellir dod o hyd i fanylion yr alwad nesaf yma: Tendrau
Grantiau i Gylchgronau Bach a Gweisg Bychain
Grantiau i gefnogi mentrau cyhoeddi bach, lleol yn aml, ac i hybu talent greadigol newydd. Gellir cyflwyno ceisiadau unwaith y flwyddyn a hynny ym mis Gorffennaf. Cysylltwch am fanylion pellach â’n Swyddog Datblygu Cyhoeddi (Saesneg), Dr Ashley Owen, ar english.grants@books.wales.
Grantiau Gweithgareddau Marchnata Bach
Grantiau bach tuag at hyrwyddo teitlau llenyddol unigol neu grwpiau o deitlau. Nod y cynllun hwn yw ariannu lansiadau a gweithgareddau marchnata bach.
Cyrsiau Hyfforddi
Mae cronfa fechan i’w defnyddio ar gyfer cyrsiau i gyhoeddwyr a ddarperir gan Gyngor Llyfrau Cymru. Ymhlith yr hyfforddiant a gynhaliwyd yn ddiweddar mae cyrsiau ar olygu, marchnata a rheoli busnes. Am ragor o fanylion cysylltwch â’r Swyddog Datblygu Cyhoeddi (Saesneg) ar english.grants@books.wales.
