Cyhoeddi Rhestrau Byrion Clawr y Flwyddyn 2025 – llyfrau plant a phobl ifanc
Cyhoeddi Rhestrau Byrion Gwobrau Clawr y Flwyddyn 2025 am Lyfrau i Blant a Phobl Ifanc
Heddiw, dydd Llun 15 Medi, mae Cyngor Llyfrau Cymru wedi cyhoeddi’r llyfrau sydd wedi cyrraedd y rhestrau byrion ar gyfer Gwobrau Clawr y Flwyddyn am Lyfrau i Blant a Phobl Ifanc 2025. Mae’r gwobrau, a sefydlwyd y llynedd, yn dathlu cyfraniad darlunwyr a dylunwyr, a’u gwaith i ddod â straeon yn fyw a chreu llyfrau trawiadol a deniadol sy’n apelio at ddarllenwyr ifanc.
Mae dau gategori i’r gwobrau – Clawr Llyfr Cymraeg a Chlawr Llyfr Saesneg. Dewiswyd y llyfrau ar y rhestrau byrion gan aelodau Panel Pobl Ifanc y Cyngor Llyfrau. Y llyfrau yw:
Clawr Llyfr Cymraeg:
- Gwen ac Arianrhod (Gwasg Carreg Gwalch). Darluniad y clawr: Lleucu Gwenllian. Dyluniad y clawr: Eleri Owen. Awdur: Lleucu Gwenllian.
- Nos Da Blob (Y Lolfa). Darluniad y clawr: Huw Aaron. Dyluniad y clawr: Opal Roengchai. Awdur: Huw Aaron.
- Ysgol Arswyd (Y Lolfa). Darluniad y clawr: Sian Angharad. Awdur: Catrin Angharad Jones.
Clawr Llyfr Saesneg:
- Colours of Home (Graffeg). Darluniad y clawr: Miriam Latimer. Awdur: Miriam Latimer.
- The Street Food Festival (Atebol). Darluniad y clawr: Valériane Leblond. Dyluniad y clawr: Tanwen Haf, Whitefire Designs. Awdur: Gail Sequeira.
- Fishfolk (Firefly Press). Darluniad y clawr: Hannah Doyle. Awdur: Steven Quincey-Jones.
Dywedodd Helgard Krause, Prif Weithredwr Cyngor Llyfrau Cymru: “Llongyfarchiadau mawr i’r dylunwyr a’r darlunwyr talentog sydd wedi cyrraedd y rhestrau byrion ar gyfer y gwobrau eleni. Mae gan gloriau llyfrau rôl mor bwysig wrth ein helpu i ddewis beth i’w ddarllen nesaf ac weithiau gallant ein perswadio i godi llyfr na fyddem byth wedi meddwl amdano neu ein helpu i ddarganfod awdur newydd. Rwy’n edrych ymlaen at weld pwy fydd yr enillwyr wedi’r cyhoeddiad yn ddiweddarach y mis hwn.”
Bydd y dylunydd/darlunydd o’r clawr buddugol ym mhob categori yn ennill neu rannu gwobr ariannol o £500. Cyhoeddir yr enillwyr ar 26 Medi 2025. Cefnogir y Gwobrau gan Adran Addysg Llywodraeth Cymru o dan Raglen Cymorth Grant y Cwricwlwm.
