Cyhoeddi enillwyr Gwobrau Clawr y Flwyddyn am Lyfrau i Blant a Phobl Ifanc, 2024

Heddiw, dydd Iau 28 Tachwedd, mae Cyngor Llyfrau Cymru wedi cyhoeddi teitlau’r llyfrau sydd wedi ennill Gwobrau Clawr y Flwyddyn am Lyfrau i Blant a Phobl Ifanc, a gyflwynir am y tro cyntaf yn 2024.

Mae dau gategori i’r gwobrau – Clawr Llyfr Cymraeg a Chlawr Llyfr Saesneg. Yr enillwyr yw:

Enillydd y categori Gymraeg:
Mynd i Weld Nain Darluniad y clawr gan Lily Mŷrennin. Dyluniad y clawr gan Richard Pritchard. Awdur: Delyth Jenkins. Cyhoeddir gan Y Lolfa.

Enillydd y categori Saesneg:
The Song that Sings Us Darluniad y clawr gan Jane Matthews. Dyluniad y clawr gan Becka Moor. Awdur: Nicola Davies. Cyhoeddir gan Firefly Press.

Dywedodd Lily Mŷrennin, darlunydd y clawr Cymraeg buddugol: “Am anrhydedd i glywed bod y llyfr bach gaeafol hwn wedi cael ei ddewis i ennill y wobr! Mae’r darluniau yn dathlu clydwch yr adeg yma o’r flwyddyn, a dwi’n gobeithio y gall pawb brofi ychydig o hud yn ei dudalennau.”

Dywedodd Ellyw Jenkins o’r Lolfa: “Mae’r Lolfa yn falch iawn bod clawr y llyfr Mynd i Weld Nain wedi dod i’r brig yn y gystadleuaeth Gwobr Clawr Llyfrau Plant 2024, a bod gwaith arlunio gwych Lily Mŷrennyn wedi cael cydnabyddiaeth. Gobeithio y bydd pawb yn mynd allan i brynu’r llyfr arbennig yma – mae’n anrheg Nadolig perffaith!”

Dywedodd Jane Matthews, darlunydd y clawr Saesneg buddugol: “Waw, mae hyn yn newyddion arbennig! Rwy’n falch iawn o ennill y wobr newydd wych hon, yn enwedig o ystyried y tri chlawr hardd, bywiog yr oedd The Song that Sings Us yn eu herbyn. Rwyf wrth fy modd bod y wobr hon wedi ei sefydlu i ddathlu dyluniadau cloriau, ac mae’n golygu llawer i gael cydnabyddiaeth Cyngor Llyfrau Cymru a’u Panel Pobl Ifanc.”

Dywedodd Penny Thomas o Firefly: “Rydym wrth ein bodd bod clawr syfrdanol Jane a Becka ar gyfer The Song that Sings Us wedi ennill Gwobr Clawr Llyfrau Plant Cymru, ym mlwyddyn gyntaf y gystadleuaeth. Mae hyn yn gydnabyddiaeth wych o’u sgiliau artistig a dylunio rhagorol a’u dychymyg!”

Sefydlwyd y gwobrau er mwyn dathlu a chydnabod cyfraniad darlunwyr a dylunwyr, a’u gwaith i ddod â straeon yn fyw a chreu llyfrau trawiadol a deniadol sy’n apelio at ddarllenwyr ifanc.

Dewiswyd yr wyth llyfr oedd ar y rhestrau byrion gan aelodau Panel Pobl Ifanc y Cyngor Llyfrau. Dewiswyd enillwyr y ddau gategori trwy bleidlais gyhoeddus a gynhaliwyd ar-lein rhwng 12 a 25 Tachwedd. Mae dylunydd/darlunydd y clawr buddugol yn y ddau gategori yn ennill neu’n rhannu gwobr ariannol o £500.

Dywedodd Helgard Krause, Prif Weithredwr Cyngor Lyfrau Cymru: “Llongyfarchiadau mawr i Lily Mŷrennin a Richard Pritchard, a Jane Matthews a Becka Moor am ennill gwobrau cyntaf Clawr y Flwyddyn am Lyfrau i Blant a Phobl Ifanc.

Rydw i’n siwr ein bod ni i gyd wedi dewis llyfr oherwydd iddo ddal ein llygad ar y silff, neu wedi sylwi ar glawr sydd wedi gwneud i ni fod eisiau darganfod mwy. Mewn llyfrau i blant a phobl ifanc mae cloriau yn bwysicach fyth, gan fod darllenwyr ifanc yn dechrau darganfod llyfrau, themâu a genres newydd – ac mae clawr gwych yn gallu eu hanfon nhw ar daith darllen na fydden nhw wedi ei hystyried o’r blaen.

Felly, rydw i wrth fy modd ein bod ni wedi gallu dathlu creadigwrydd a thalent darlunwyr a dylunwyr Cymru wrth gyflwyno’r gwobrau hyn, a hoffwn ddiolch i bawb sydd wedi cyfrannu at yr holl lyfrau ar y rhestrau byrion eleni.”

Y llyfrau eraill ar y rhestrau byrion oedd:

Clawr Llyfr Cymraeg:
Ac Rwy’n Clywed Dreigiau / And I Hear Dragons Darluniad y clawr gan Eric Heyman. Dyluniad y clawr gan Becka Moor. Golygwyd gan Hanan Issa. Cyhoeddir gan Firefly.

Diwrnod Prysur Darluniad a dyluniad y clawr gan Huw Aaron. Awdur: Huw Aaron. Cyhoeddir gan Wasg Carreg Gwalch.

Mwy o Straeon o’r Mabinogi Darluniad y clawr gan Valériane Leblond. Dyluniad y clawr gan Gwasg Rily Publications. Awdur: Siân Lewis. Cyhoeddir gan Gwasg Rily Publications.

Clawr Llyfr Saesneg:
Ceri & Deri: 1,2,3 Darluniad y clawr gan Max Low. Dyluniad y clawr gan Joana Rodrigues, Graffeg. Awdur: Max Low. Cyhoeddir gan Graffeg.

Lilly & Myles: The Torch Darluniad y clawr gan Hannah Rounding. Dyluniad y clawr gan Joana Rodrigues, Graffeg. Awdur: Jon Roberts. Cyhoeddir gan Graffeg.

Tapper Watson and the Quest for the Nemo Machine Darluniad y clawr gan Becka Moor. Awdur: Claire Fayers. Cyhoeddir gan Firefly.

Dathlu amrywiaeth drwy lyfrau i blant a phobl ifanc

Mae Cyngor Llyfrau Cymru wedi lansio detholiad newydd o lyfrau gwreiddiol i blant a phobl ifanc mewn digwyddiad arbennig yn Yr Egin yng Nghaerfyrddin. Cafodd dysgwyr o ysgolion lleol eu gwahodd i weld y llyfrau newydd ac i gwrdd â’r awduron.

Sefydlwyd prosiect Rhyngom, a ariennir gan Lywodraeth Cymru, er mwyn cyhoeddi mwy o lyfrau i ddarllenwyr ifanc sy’n cynrychioli diwylliant, pobl a hanes Cymru gyfan, ac sy’n dathlu a hyrwyddo amrywiaeth. Mae’r lansiad yn dathlu carreg filltir gyffrous wrth i lyfrau gwreiddiol newydd, a gomisiynwyd fel rhan o’r cynllun, gael eu cyhoeddi.

Mae’r llyfrau newydd yn cynnwys gweithiau gan awduron newydd yn ogystal ag awduron sefydledig. Un o’r prif amcanion wrth gomisiynu llyfrau gwreiddiol Cymraeg a Saesneg fel rhan o’r cynllun hwn oedd sicrhau cyfleoedd cyhoeddi i awduron a darlunwyr o ystod o gefndiroedd a chymunedau sy’n cael eu tangynrychioli. Cefnogwyd rhai awduron newydd i weithio gyda mentor neu i gydysgrifennu gydag awdur mwy profiadol.

Ymhlith y llyfrau newydd mae:

Y Ransh ym Mhen Draw’r Byd / The Ranch at the End of the World gan Emma Bettridge. Addasiad gan Sioned Erin Hughes (Graffeg).

Hanes fy Hynodrwydd / A History of My Weird gan Chloe Heuch. Addasiad gan Mared Llwyd (Firefly).

Megs / Megs gan Meleri Wyn James (Y Lolfa).

Zac a Jac / Zac and Jac gan Cathy Jenkins. Addasiad gan Ceri Wyn Jones (Graffeg).

20 o Bobl Liwgar Cymru / 20 Colourful People of Wales gan Natalie Jones (Y Lolfa).

Cartref o Liw / Colours of Home gan Miriam Latimer. Addasiad gan Anwen Pierce (Graffeg).

Gŵyl y Gaeaf / The Winter Festival gan Rebecca Wilson (Rily).

Dywedodd Helgard Krause, Prif Weithredwr Cyngor Llyfrau Cymru: “Llongyfarchiadau i’r awduron a’r cyhoeddwyr sydd wedi gweithio mor galed i gynhyrchu’r detholiad hyfryd yma o lyfrau, rhai ohonyn nhw gan awduron newydd. Dwi’n edrych ymlaen yn arw at eu darllen nhw i gyd!

“Mae Rhyngom yn brosiect tair blynedd a fydd yn arwain at gyhoeddi 48 o lyfrau darllen er pleser i blant a phobl ifanc; yn hyrwyddo ac yn dathlu amrywiaeth ac yn adlewyrchu mwy o’n straeon, ein pobl a’n cymunedau yng Nghymru. Diolch i’n partneriaid niferus sydd wedi rhannu eu cyngor a’u harbenigedd ac wedi gwneud y prosiect yma’n bosib.

“Roedd yn bleser pur lansio’r llyfrau newydd heddiw ac rydyn ni’n ddiolchgar iawn i Adran Addysg Llywodraeth Cymru am eu harian a’u cefnogaeth.”

Dywedodd Ysgrifennydd y Cabinet dros Addysg, Lynne Neagle AS: “Hoffwn ychwanegu fy llongyfarchiadau i’r awduron a diolch i bawb sydd wedi cyfrannu at y prosiect. Mae mor bwysig i’n hysgolion gael llyfrau darllen newydd, yn Gymraeg ac yn Saesneg, sy’n cefnogi addysgu amrywiaeth ar draws y cwricwlwm, gan gefnogi ein dysgwyr gyda’u sgiliau llythrennedd ac empathi, a chyfrannu at eu lles meddyliol ac emosiynol.”

Yn y digwyddiad lansio heddiw, a arweiniwyd gan Miriam Isaac, bu dysgwyr Blwyddyn 2 o Ysgol y Dderwen ac Ysgol y Model yn cwrdd â’r awduron Rebecca Wilson, Natalie Jones, Miriam Latimer a Gail Sequeira. Buon nhw’n cymryd rhan mewn gweithdai a gweithgareddau i archwilio’r themâu, y syniadau a’r straeon sydd yn y llyfrau ar gyfer oedran yr ysgol gynradd. Yn y prynhawn, teithiodd yr awduron Chloe Heuch, Megan Angharad Hunter, Meleri Wyn James a Cathy Jenkins i Ysgol Bro Taf i gwrdd â dysgwyr Blwyddyn 7 ac i lansio’r llyfrau ar gyfer oedran yr ysgol uwchradd.

Dyma gam cyntaf prosiect tair blynedd gwerth £810,000 a ariennir gan Lywodraeth Cymru. Bydd cam dau yn dilyn ym mis Mawrth 2025, pan gyhoeddir addasiadau Cymraeg o 28 o deitlau Saesneg sy’n hyrwyddo a dathlu amrywiaeth – yn eu plith, teitlau sydd wedi ennill gwobrau fel y Diverse Book Award – a byddant ar gael i’w prynu mewn siopau llyfrau neu ar-lein ar Gwales.com.

Y trydydd cam fydd cyhoeddi adnoddau addysg i gyd-fynd â’r 48 o lyfrau. Bydd yr adnoddau hyn ar gael ar ffurf print ac yn ddigidol, ac yn darparu canllaw ychwanegol a gwerthfawr i athrawon yng Nghymru; byddant ar gael erbyn Medi 2025.

Rhan olaf y prosiect fydd cynllun anrhegu i ysgolion cynradd ac uwchradd Cymru. Bydd pob ysgol gynradd wladol yn derbyn copi am ddim o’r llyfrau i ddarllenwyr 3–7 oed ac 8–11 oed, a phob ysgol uwchradd wladol yn derbyn copi o’r llyfrau i ddarllenwyr 8–11 oed a 12–16 oed. Byddant hefyd yn derbyn fersiynau print o’r adnoddau addysg.

Mick Felton

Gyda thristwch y clywodd Cyngor Llyfrau Cymru am farwolaeth Mick Felton.

Fel cyhoeddwr Seren, roedd gan Mick rôl ganolog yn y byd cyhoeddi yng Nghymru am ddeugain mlynedd. Mae dyled y diwydiant ac awduron Cymru yn fawr iddo.

Gwerthfawroga’r Cyngor Llyfrau y gwaith aruthrol y mae cyhoeddwyr yn gyffredinol, a Mick yn benodol, wedi ei wneud yn dawel, y tu ôl i’r llenni, i sicrhau bod cyhoeddi yng Nghymru a chan awduron Cymreig yn parhau i ffynnu. Llafur cariad yw hyn yn aml iawn a rhoddodd Mick y cyfan i’w waith.

Creulon o fyr fu’r ymddeoliad yr oedd wedi’i haeddu ac mae ein meddyliau ni gyda’i gydweithwyr yn Seren a’r rhai oedd agosaf ato.

18 Tachwedd 2024

Islwyn Ffowc Elis (1924–2004)

Rhai atgofion Robin Chapman

Tua chanol haf 1996, yn sgil derbyn comisiwn i lunio cyfrol fach ar Islwyn i’r gyfres Writers of Wales, ysgrifennais ato i ddweud y byddwn yng nghyffiniau ei gartref yn Llanbedr Pont Steffan o fewn ychydig wythnosau ac mai braf fyddai cyfarfod. Daeth pecyn swmpus yn ateb: llythyr yn fy ngheryddu am ei alw yn ‘Dr Elis’ (‘Islwyn wyf fi i’m ffrindiau’) ac yn fy nghroesawu i alw yn y tŷ am goffi neu ginio canol dydd neu de pnawn. Amgaeodd fap manwl yn ei law ei hun, awgrymiadau ar leoedd i aros, a sawl tudalen o CV a llyfryddiaeth, y cyfan wedi’i deipio’n unswydd. Fel y digwyddodd, treuliasom y bore ar ei aelwyd a rhan o’r pnawn mewn gwesty cyfagos (Islwyn yn mynnu prynu’r diodydd), cyn imi ffarwelio ag ef gyda llwyth o bapurau a llyfrynnau a thoriadau o bapurau newydd – a gwahoddiad i alw eto.

Ac wrth i’r ymdriniaeth fer Saesneg – a’r bywgraffiad Cymraeg llawnach o dipyn a luniais yn ei sgil – ddod at ei gilydd (cyhoeddwyd yr ail yn 2003, o fewn ychydig fisoedd i’w farw), ni pheidiodd y cyswllt na’r pecynnau: sylwadau ar ddrafftiau o’r penodau, tameidiau o atgof, ffynonellau ac enwau a allai fod o ddefnyddiol – ac un ysgrif go faith, ‘Pam y blynyddoedd mud? Ymgais i esbonio’, yn ceisio egluro pam y ffrwydrodd ei ddawn mor drawiadol yn yr 1950au a darfod mor derfynol erbyn canol yr 1960au.

Prin fod angen yr ysgrif. Yr oedd rhan o’r eglurhad ym mhob pecyn: ei gymwynasgarwch diymarbed. Oherwydd nid fi oedd yr unig un i’w brofi.

Egwyddor bywyd Islwyn oedd plesio. Bodloni disgwyliadau ei rieni a’i cymhellodd i fynd i’r weinidogaeth. Lluniodd Cysgod y Cryman (1953) er mwyn hybu llenyddiaeth boblogaidd, a hyd yn oed wedi iddo fentro mynd yn llenor hunangyflogedig treuliodd fisoedd yn ysgrifennu Wythnos yng Nghymru Fydd (1957) fel rhodd i Blaid Cymru, gan ildio’r hawl i Gwynfor Evans farnu a oedd y cynllun a’r cynnwys yn dderbyniol. Yr un awydd i fod o gymorth a’i sbardunodd er ei waethaf i sefyll fel ymgeisydd seneddol yn Sir Drefaldwyn yn 1962, ac i wneud yr un peth eto, yntau bellach yn byw ymhell, yn 1964. A rhwng y ddwy ymgyrch, dan bwysau teulu ei wraig, cymerodd ei berswadio i gynnig am swydd sefydlog fel darlithydd yng Ngholeg y Drindod, Caerfyrddin – a’i gael ei hun wrth law pan lansiodd Gwynfor ei ymgyrch hanesyddol yn yr isetholiad ddwy flynedd yn ddiweddarach. Rhwng y pwysau a osododd arno’i hun i fod yn llenor at iws gwlad, ei euogrwydd ynghylch cefnu ar yr alwedigaeth a fynnai eraill iddo, ei ymdeimlad o ddyletswydd i’w blaid a swydd na fynnai fod ynddi, ni fu dianc wedyn. Ac o hyd ac o hyd drwy ei yrfa, amhosibl iddo oedd dweud Na. Sgets fach i gwmni drama? Pleser. Beirniadu yn yr Eisteddfod? Wrth gwrs. Bwrw golwg dros gasgliad o straeon byrion gan lenor ifanc anghyhoeddedig? Hapus i wneud.

Anodd anghofio’r ymweliad â Llanbedr Pont Steffan, yr haelioni a’r sgwrs – a’r gair o gyngor wrth imi ymadael dan fy maich: ‘Peidiwch â mynd i drafferth o’m rhan i, cofiwch. Peidiwch â gweithio’n rhy galed.’

GWOBRAU CLAWR Y FLWYDDYN CYMRU 2024 AM LYFRAU I BLANT A PHOBL IFANC

Mae Cyngor Llyfrau Cymru wedi cyhoeddi’r llyfrau sydd wedi cyrraedd y rhestrau byrion yn eu Gwobrau Clawr y Flwyddyn am Lyfrau i Blant a Phobl Ifanc a gyflwynir am y tro cyntaf erioed yn 2024.

Mae dau gategori i’r gwobrau – Clawr Llyfr Cymraeg a Chlawr Llyfr Saesneg. Dewiswyd y llyfrau ar y rhestrau byrion gan y naw aelod o Banel Pobl Ifanc y Cyngor Llyfrau. Bydd enillwyr y ddau gategori yn cael eu dewis drwy bleidlais gyhoeddus a gynhelir ar-lein rhwng 12 a 25 Tachwedd. Bydd pleidleisio’n cau am hanner dydd, 25 Tachwedd 2024.

Y llyfrau ar y rhestrau byrion yw:

Clawr Llyfr Cymraeg:

Ac Rwy’n Clywed Dreigiau / And I Hear Dragons Darluniad y clawr gan Eric Heyman. Dyluniad y clawr gan Becka Moor. Golygwyd gan Hanan Issa. Cyhoeddir gan Firefly.

Diwrnod Prysur Darluniad a dyluniad y clawr gan Huw Aaron. Awdur: Huw Aaron. Cyhoeddir gan Wasg Carreg Gwalch.

Mwy o Straeon o’r Mabinogi Darluniad y clawr gan Valériane Leblond. Dyluniad y clawr gan Gwasg Rily Publications. Awdur: Siân Lewis. Cyhoeddir gan Gwasg Rily Publications.

Mynd i Weld Nain Darluniad y clawr gan Lily Mŷrennin. Dyluniad y clawr gan Richard Pritchard. Awdur: Delyth Jenkins. Cyhoeddir gan Y Lolfa.

Clawr Llyfr Saesneg:

Ceri & Deri: 1,2,3 Darluniad y clawr gan Max Low. Dyluniad y clawr gan Joana Rodrigues, Graffeg. Awdur: Max Low. Cyhoeddir gan Graffeg.

Lilly & Myles: The Torch Darluniad y clawr gan Hannah Rounding. Dyluniad y clawr gan Joana Rodrigues, Graffeg. Awdur: Jon Roberts. Cyhoeddir gan Graffeg.

Tapper Watson and the Quest for the Nemo Machine Darluniad y clawr gan Becka Moor. Awdur: Claire Fayers. Cyhoeddir gan Firefly.

The Song that Sings Us Gwaith celf y clawr gan Jane Matthews. Awdur: Nicola Davies. Cyhoeddir gan Firefly.

Sefydlwyd y gwobrau er mwyn dathlu a chydnabod cyfraniad darlunwyr a dylunwyr, a’u gwaith i ddod â straeon yn fyw a chreu llyfrau trawiadol a deniadol sy’n apelio at ddarllenwyr ifanc.

Dywedodd Helgard Krause, Prif Weithredwr Cyngor Llyfrau Cymru: “Rydym mor gyffrous i lansio ein Gwobrau Clawr y Flwyddyn cyntaf erioed eleni er mwyn anrhydeddu a chydnabod ansawdd rhagorol dyluniadau llyfrau i blant a phobl ifanc yng Nghymru.

“Mae’r gwobrau hyn yn dathlu’r dylunwyr a’r darlunwyr talentog hynny sy’n creu cloriau llyfrau i dynnu sylw, sy’n cyfleu dim ond digon o’r stori, ac sydd â’r cydbwysedd perffaith rhwng teitl, awdur a delwedd – ac sydd, yn y pen draw, yn ysbrydoli darllenwyr ifanc i fachu eu llyfr nesa. Rydym yn edrych ymlaen yn arw at weld pa lyfrau fydd yn cael eu dewis fel enillwyr i’r bleidlais gyhoeddus dros yr wythnosau nesaf, ac rydym yn dymuno’r gorau i bawb sydd ar y rhestrau byrion.”

Bydd dylunydd/darlunydd y clawr buddugol yn y ddau gategori yn ennill neu’n rhannu gwobr ariannol o £500. Bydd yr enillwyr yn cael eu penderfynu gan bleidlais gyhoeddus ar-lein rhwng 12 Tachwedd a 25 Tachwedd. Bydd pleidleisio’n cau am hanner dydd, 25 Tachwedd 2024. Gellir pleidleisio unwaith ym mhob categori trwy’r dolen yma:

Pleidleisiwch yma: https://www.surveymonkey.com/r/ClawrLlyfrPlantYFlwyddyn

Cyhoeddir yr enillwyr ar ddydd Iau 28 Tachwedd 2024.

Cymru yn Ffair Lyfrau Frankfurt: Arddangos Cymru yn ffair gynnwys fwyaf y byd

Bydd gan Gymru bresenoldeb yn Ffair Lyfrau Frankfurt fis Hydref eleni am yr ail flwyddyn yn olynol, diolch i gyllid gan Lywodraeth Cymru trwy Cymru Greadigol. Mae Cyngor Llyfrau Cymru yn cydlynu presenoldeb Cymruyn y ffair i hyrwyddo’r llyfrau a’r awduron gorau o Gymru ar lwyfan rhyngwladol.

Cynhelir Ffair Lyfrau Frankfurt bob blwyddyn ym mis Hydref a hi yw’r ffair gynnwys fwyaf yn y byd, gyda chynrychiolaeth o wledydd o bob cwr o’r byd yn teithio i’r Almaen i arddangos y gorau o’u llyfrau a’u llenyddiaeth ar draws pob genre.

Denodd y digwyddiad diwylliannol allweddol hwn 4,000 o arddangoswyr o 95 o wledydd yn 2023, yn ogystal â thros 100,000 o ymwelwyr masnach o 130 o wledydd.[1] Trwy fynychu, gall cyhoeddwyr yng Nghymru gwrdd â chynrychiolwyr o ddiwydiannau creadigol eraill, fel ffilm a gemau, yn ogystal â chyhoeddwyr eraill, i drafod cydweithredu, hawliau a thrwyddedu, ac i feithrin perthnasoedd.

Dywedodd Helgard Krause, Prif Weithredwr Cyngor Llyfrau Cymru: “Rydym yn falch iawn o fod yn cydlynu Cymru yn Frankfurt eleni a mynychu ochr yn ochr â’n cydweithwyr cyhoeddi i ddathlu llenyddiaeth o Gymru a’i chyflwyno i’r byd.

“Mae’r sector cyhoeddi dwyieithog yng Nghymru yn rhan o’r economi sylfaenol sy’n sector blaenoriaeth Llywodraeth Cymru o fewn y Diwydiannau Creadigol. Diolch i Lywodraeth Cymru, mae cyhoeddwyr o Gymru yn cael y cyfle hwn i wneud cysylltiadau busnes newydd o bob rhan o Ewrop a’r byd, i gyfnewid syniadau ac agor marchnadoedd newydd ar gyfer llyfrau a chynnwys o Gymru yn y ddwy iaith.”

Dywedodd Owain Saunders-Jones o gwmni cyhoeddi Atebol: “Mae Ffair Lyfrau Frankfurt yn gyfle arbennig i arddangos diwydiant cyhoeddi Cymru i’r byd cyhoeddi ehangach.

“Yn genedl sy’n llawn creadigrwydd a thalent, mae’n bwysig fod buddsoddiad yn parhau i gefnogi swyddi a’r iaith. Dyma ddiwydiant sy’n rhoi mwynhad, addysg, ymdeimlad o berthyn, a seiliau cadarn i lythrennedd a phob pwnc arall i’n plant. Beth allai fod yn fwy pwysig?”

Dywedodd Gweinidog y Diwydiannau Creadigol, Jack Sargeant: “Rydym wedi ymrwymo i gefnogi cyhoeddwyr ac awduron Cymru ac mae’n newyddion da y byddant yn cael eu cynrychioli eleni eto yn Frankfurt. Rwy’n dymuno pob llwyddiant i’r ddirprwyaeth o Gymru wrth iddynt geisio sicrhau bod mwy o eiriau a straeon o Gymru yn cael eu clywed a’u darllen ledled y byd.”

Mae Ffair Lyfrau Frankfurt ar agor rhwng 16 a 20 Hydref 2024. Gallwch ddarganfod mwy am y ffair yma: Frankfurter Buchmesse | Home

[1] Get to know Frankfurter Buchmesse

Bethan Gwanas yn derbyn yr anrhydedd uchaf ym maes llyfrau plant yng Nghymru:
Cyhoeddi derbynnydd Gwobr Mary Vaughan Jones 2024

Mae Gwobr Mary Vaughan Jones 2024, yr anrhydedd uchaf ym maes llyfrau plant yng Nghymru, wedi ei dyfarnu i Bethan Gwanas, i ddathlu ei chyfraniad rhagorol i lenyddiaeth i blant a phobl ifanc.

Fe gyflwynir y wobr bob tair blynedd gan Gyngor Llyfrau Cymru er cof am Mary Vaughan Jones, a fu farw yn 1983, i berson a wnaeth gyfraniad arbennig i faes llenyddiaeth plant yng Nghymru.

Yn ystod ei gyrfa fel awdur, mae Bethan wedi cyhoeddi 51 o lyfrau amrywiol ar gyfer plant, pobl ifanc, oedolion iaith gyntaf a dysgwyr. Mae hi wedi gwneud cyfraniad eang a gwerthfawr i lenyddiaeth plant a phobl ifanc ac mae ei straeon yn aml yn cynnwys cymeriadau benywaidd cryf a phenderfynol, fel Efa yng nghyfres Y Melanai.

Mae hi wedi ennilll Gwobr Tir na n-Og ddwywaith – gyda Llinyn Trôns yn 2001 a Sgôr yn 2003. Ystyrir nifer o’i llyfrau bellach yn glasuron llenyddol i blant a phobl ifanc, fel Llinyn Trôns, Ceri Grafu, Gwylliaid, Pen Dafad a chyfres Cadi ar gyfer darllenwyr iau.

Dywedodd Helgard Kause, Prif Weithredwr Cyngor Llyfrau Cymru: “Mae cyfraniad Bethan Gwanas at faes llenyddiaeth i blant a phobl ifanc yng Nghymru yn eithriadol ac mae’n bleser cael cyflwyno Gwobr Mary Vaughan Jones 2024 iddi i gydnabod ei chyflawniadau niferus yn y maes hwn. Yn ogystal ag ysgrifennu straeon gwych, mae Bethan yn angerddol am hyrwyddo darllen a llyfrau Cymraeg, ac mae hi’n gweithio’n ddiflino gydag ysgolion a llyfrgelloedd, ac ar-lein, i ysbrydoli plant a phobl ifanc i ddarllen. Llongyfarchiadau mawr i chi, Bethan, ar y wobr haeddiannol hon.”

Dywedodd Bethan Gwanas: “Ges i andros o sioc. Ro’n i mewn pwyllgor ac yn sydyn, mi gerddodd pwysigion y Cyngor Llyfrau i mewn. “Bethan, roeddet ti’n meddwl dy fod ti yma i bwyllgora, ond…” Roedd o’n teimlo fel croes rhwng This Is Your Life a’r Brodyr Bach. Fy ymateb cyntaf oedd, “Be sy haru chi?’ ond wedyn dyma sylweddoli: “Na, dwi’n haeddu hyn!” Wedi oes o wasanaeth, mae rhai’n cael cloc. Dwi’n cael Tlws Coffa Mary Vaughan Jones! A do, dwi wedi dotio, ac yn diolch o waelod calon am yr anrhydedd. Mae’n golygu’r byd i mi.”

Magwyd  Bethan Gwanas yn y Brithdir ger Dolgellau. Ar ôl graddio mewn Ffrangeg ym Mhrifysgol Aberystwyth, cafodd nifer o swyddi gwahanol, gan gynnwys gweithio gyda’r VSO yn Nigeria, dod o hyd i extras ar gyfer Rownd a Rownd, dysgu plant Cymru sut i ganŵio a dringo yng Nglan-llyn, a chyflwyno rhaglenni garddio a theithio ar y cyfryngau.

Cynhelir dathliad arbennig ym mis Tachwedd i ddathlu cyflawniad Bethan ac i gyflwyno’r wobr iddi yng nghwmni teulu a chyfeillion o’r byd llyfrau a thu hwnt.

YSBRYDOLI DARLLENWYR IFANC YN Y DOSBARTH

Mae gan athrawon mewn ysgolion ledled Cymru adnodd newydd i’w helpu i ysbrydoli cariad at ddarllen gyda’u dysgwyr ifanc.

Heddiw, 1 Hydref, mae Cyngor Llyfrau Cymru wedi lansio Pecyn Dathlu Darllen ar gyfer ysgolion cynradd ac uwchradd, sy’n llawn dop o syniadau, gweithgareddau ac adnoddau arbennig i fwynhau darllen yn y dosbarth.

Crëwyd y pecyn yn dilyn adborth a dderbyniwyd gan athrawon yng Nghymru yn gofyn am adnoddau i’w helpu i ddathlu darllen trwy gydol y flwyddyn, yn ogystal â nodi dathliadau poblogaidd eraill fel Diwrnod y Llyfr ym mis Mawrth a Diwrnod y Llyfr a Hawlfraint UNESCO ym mis Ebrill.

Dywedodd Ruth James, athrawes yn Ysgol Gymraeg Bro Ogwr: “Roedd llu o syniadau newydd sbon yno fyddai’n ennyn diddordeb y disgyblion i ddarllen. Mae cael adnodd fel hyn mor werthfawr. Byddwn ni bendant yn defnyddio nifer o’r gweithgareddau eleni ac yn annog gweddill y staff hefyd i’w defnyddio. Dwi ddim yn gallu pwysleisio digon bwysigrwydd creu diwylliant darllen ar lawr y dosbarth.”

Dywedodd Bethan Jones, Pennaeth yr Adran Llyfrau Plant a Hyrwyddo Darllen: “Rydym wrth ein boddau’n cynnig y pecyn arbennig yma i athrawon ledled Cymru, i’w helpu nhw i feithrin cariad at ddarllen ac i fwynhau llyfr arbennig gyda dysgwyr yn y dosbarth.

“O’n harolwg ysgolion a gynhaliwyd yn 2023, rydym wedi derbyn y neges yn glir gan athrawon y bydden nhw’n croesawu adnoddau i’w helpu nhw i greu mwy o gyfleoedd i ddathlu darllen yn y dosbarth drwy gydol y flwyddyn.

“Mae’r pecyn yn rhoi sylw i ddetholiad o lyfrau o Gymru, ac mae’n cynnwys gweithgareddau, canllawiau trafodaeth a recordiadau o awduron. Mae hefyd yn cynnig cysylltiadau at bynciau ar draws y Cwricwlwm i Gymru, ynghyd â syniadau y gellid eu haddasu ar gyfer astudio llyfrau eraill.

“Mae’r pecyn hefyd yn llawn syniadau gwych ar gyfer dathlu llyfrau o fewn y dosbarth a thu hwnt – o ddigwyddiadau darllen, cyfnewid llyfrau, arddangosfeydd a gwasanaethau – er mwyn rhoi darllen a chariad at lyfrau wrth graidd bywyd yr ysgol.

“Rydym yn wir obeithio bydd y pecyn yn ateb y galw gan athrawon am adnoddau i’w helpu yn y dosbarth i wneud darllen er pleser yn rhan o batrwm dyddiol yr ysgol.”

Mae’r Pecyn Dathlu Darllen ar gael i ysgolion ei lawrlwytho o wefan y Cyngor Llyfrau: Pecyn Dathlu Darllen | Cyngor Llyfrau Cymru

HER YR HYDREF

• Eisiau darllen mwy o lyfrau Cymraeg ond ddim yn gwybod ble mae dechrau?
• Ydy dod o hyd i amser i chi’ch hunan yn brin?
• Angen her i’w chyflawni dros yr hydref?

Ymunwch â Her yr Hydref!

Os ydy’n anodd cael hyd i amser i ymlacio, neu os carech chi ddarllen mwy ac ymgolli mewn llyfr da ond bod amser yn brin, mae Her yr Hydref yn ffordd wych o ddechrau arni.

Mae’r her yn eich annog i ddarllen un llyfr Stori Sydyn bob wythnos yn ystod mis Hydref. Mae’r gyfres arbennig hon o lyfrau byrion gan awduron poblogaidd yn cynnig y cyfle perffaith i bori mewn llyfr – hyd yn oed os mai dim ond ychydig o funudau bob dydd sydd gennych.

Mae nifer o lyfrau Stori Sydyn o bob math ar gael yn y Gymraeg, rhai ffuglen a ffeithiol, gan awduron fel Fflur Dafydd, Dylan Ebenezer a Manon Steffan Ros. Gyda’r llyfrau yn costio £1 yr un, ac yn rhyw 100 o dudalennau o hyd, maen nhw’n berffaith ar gyfer taith trên i’r gwaith, darllen dros amser cinio neu ddeg munud gyda phaned, gyda theitlau newydd yn cael eu cyhoeddi bob blwyddyn fel rhan o’r cynllun. Eleni, cyhoeddir y ddwy gyfrol newydd yn y Gymraeg gan y Lolfa:

Deffro’r Ddraig – Rygbi Cymru 1998–2024 gan Seimon Williams. Llyfr am rygbi Cymru yn yr oes broffesiynol sy’n edrych ar y gemau mawr, y prif gymeriadau a rhai o straeon pwysicaf y gamp dros y chwarter canrif diwethaf. Daw’r stori i ben drwy edrych ar y garfan ifanc, a thaith yr haf i Awstralia yn 2024.

Tywyllwch y Fflamau gan Alun Davies. Mae’n rhaid i’r Ditectif Bedwyr Campell gamu’n ôl i’r gorffennol wedi i lun gwerthfawr ddod i’r fei – llun o ferch ifanc yn cael ei llosgi ar goelcerth. Mae’r llun yn gysylltiedig â llofruddiaeth casglwr celf yn ardal Aberystwyth ddeg mlynedd ynghynt. A fydd Ditectif Campell yn llwyddo i ddod o hyd i’r lleidr a’r llofrudd?

Dywedodd Helgard Krause, Prif Weithredwr Cyngor Llyfrau Cymru: “Rydym i gyd yn gwybod pa mor anodd gall hi fod i gael awr neu ddwy i ymlacio ac ymgolli mewn llyfr da. Y peth gorau am gyfres Stori Sydyn ydy’r ffaith bod y llyfrau wedi’u hysgrifennu ar gyfer pobl brysur, felly gallwch chi fwynhau llyfr gwych gan awdur arbennig mewn ychydig o sesiynau byr. Mae Sialens Her yr Hydref yn ffordd hawdd i neilltuo amser i ddarllen bob wythnos, ac efallai byddwch chi’n darganfod eich hoff awdur nesaf ar yr un pryd!”

I ddarllenwyr sydd wedi mwynhau cyfres Amdani i ddysgwyr, mae llyfrau Stori Sydyn yn gam naturiol tuag at ddarllen llyfrau hirach.

Dywedodd Helen Prosser, Cyfarwyddwr Dysgu ac Addysgu yn y Ganolfan Dysgu Cymraeg Genedlaethol: “Mae’r Ganolfan yn falch iawn o gefnogi Her yr Hydref. Mae llyfrau cwrs a llyfrau darllen hamdden i ddysgwyr yn bwysig iawn o safbwynt datblygu sgiliau dysgu Cymraeg, ond hefyd yn bwysig i’r diwydiant cyhoeddi a gwerthu llyfrau. Byddwn ni’n annog ein dysgwyr sy’n ddarllenwyr brwd i ymuno yn hwyl ymgyrch Her yr Hydref.”

Datblygwyd rhaglen Stori Sydyn (Quick Reads) gan y Reading Agency, ac fe’i cydlynir yng Nghymru gan y Cyngor Llyfrau, diolch i arian gan Lywodraeth Cymru. Mae’r cyllid yn cefnogi cyhoeddi llyfrau Stori Sydyn / Quick Reads o Gymru yn y Gymraeg ac yn Saesneg, bob blwyddyn. Cyhoeddir y ddau deitl Saesneg o Gymru eleni gan Graffeg: Five Nights Out gan yr ecolegydd Hugh Warwick, a Piebald gan Nicola Davies.

Dywedodd Ysgrifennydd y Cabinet dros Addysg, Lynne Neagle AS: “Mae darllen yn sgìl hollbwysig sy’n hanfodol trwy gydol ein bywydau. Gyda chymaint ohonom yn teimlo nad oes gennym yr amser i ddatblygu’r sgiliau hynny, mae Her yr Hydref yn rhoi’r cyfle perffaith i ni. Mae’n bleser mawr cael ymgolli mewn llyfr, ac rwyf wrth fy modd bod mwy o lyfrau Cymraeg Stori Sydyn wedi eu cyhoeddi gyda chymorth cyllid Llywodraeth Cymru.

“Rwy’n dymuno pob lwc i chi i gyd gyda’r her hon. Darllen Hapus!”

Gallwch ddilyn Her yr Hydref ar Instagram @llyfrau.cymru o 1–31 Hydref 2024.

Mae rhestr o lyfrau Stori Sydyn diweddar ar gael ar wefan y Cyngor Llyfrau llyfrau.cymru